એક હજાર યાત્રિકો એક પંગત અને એક સંગતમાં બેસીને ભારતીય સંસ્કૃતિ અને જૈન દર્શન અનુૂરૂપ પૌષ્ટિક, સ્વાદિષ્ટ અને સાત્વિક ભોજન ળઈ શકે એ માટે યોગ્ય અનુકૂળ વ્યવસ્થા કરવામાં આવી છે.

દર વર્ષે લગભગ 3000 સાધુ સાધ્વીજીઓ અને લગભગ 3,00,000 શ્રદ્ધાળુઓ અહીં નિઃશુલ્ક સધાર્મિક ભક્તિનો લાભ લે છે.

શત્રુંજય ગિરિરાજ પાલિતાણા રોડ પર અયોધ્યાપુરમ તીર્થસ્થાન હોવાના કારણે છેલ્લાં વીસ વર્ષથી ભારતભરમાંથી આવતા યાત્રિકો આ વિનામૂલ્યે સધાર્મિક ભક્તિની આ સેવાનો લાભ લઈ રહ્યા છે. ભારતભરના દાતાઓના સહયોગથી આ સંભવ થઈ રહ્યું છે.

તીર્થ સંકુલમાં 4 મોટાં ઉપાશ્રયોની સુવિધા, દર્શનાર્થે આવતા સાધુ સાધ્વીજી માટે કરવામાં આવી છે. સમગ્ર વ્યવસ્થા તેમના તપસ્વી જીવન માટે અનુકૂળ છે. અહીં એક હજાર લોકોની ક્ષમતા ધરાવતા વિશાળ આરાધના હૉલનું પણ નિર્માણ કરવામાં આવ્યું છે.

તીર્થ સંકુલમાં એક આયુર્વેદિક અને એક એલોપેથિક ચિકિત્સાલય ચાલી રહ્યાં છે. જેમાં નિષ્ણાત તબીબો દર વર્ષે 10 હજાર જેટલા લોકોને વિનામૂલ્યે પ્રાથમિક તબીબી તપાસ અને સારવારની સુવિધા પૂરી પાડે છે. આ દર્દીઓ તીર્થની આસપાસનાં ગામડાઓમાં રહેતા લોકોની સાથે યાત્રાએ આવતા યાત્રાળુઓ હોય છે.

અહીં સમયાંતરે નિ:શુલ્ક આરોગ્ય તપાસણી કેમ્પનું પણ આયોજન કરવામાં આવે છે અને ગંભીર રોગોની સારવાર માટે દર્દીઓની પસંદગી કરવામાં આવે છે.

અયોધ્યાપુરમ તીર્થમાં આવતા યાત્રિકોને અગવડ ન પડે તે માટે બહાર બસ સ્ટોપ અને જળ મંદિરની સુવિધા આપવામાં આવી છે તથા ખાસ તહેવારો પર આવતા યાત્રિકોનાં વાહનો માટે અલગ પાર્કિંગની પૂરતી સુવિધા કરવામાં આવી છે.

તીર્થ સંકુલમાં ઉપરોક્ત તમામ સુવિધાઓ અને વ્યવસ્થાઓના સરળ સંચાલન માટે 100થી વધુ સેવાભાવી કાર્યકરોની ટીમ હંમેશા કાર્યરત રહે છે. જેઓ સંપૂર્ણ આત્મીયતા અને તત્પરતાથી મુલાકાતીઓની સેવા કરવામાં વ્યસ્ત રહે છે. હરિયાળીથી આચ્છાદિત તીર્થ સંકુલમાં સ્વચ્છતા પર વિશેષ ધ્યાન આપવામાં આવે છે, જેના કારણે સ્વચ્છ ભારત જેવા અભિયાન પ્રત્યે લોકોમાં જાગૃતિ આવતાં સારા પ્રયાસોને વેગ મળે છે.

અહીં જ્ઞાન, ધ્યાન, સાધના, ઉપાસના અને જિનશાસનના મહિમા સંબંધિત ત્રણ હજારથી વધુ પુસ્તકોનો જ્ઞાન ભંડાર  ઉપલબ્ધ છે.